Ku rwego rwa zone y’Ibitaro by’Intara bya Ruhango igizwe n’Ibigo Nderabuzima bya Kigoma, Ruhango, Nyarurama, Kinazi, Kizibere na Mbuye, gutangiza iki cyumweru ku mugaragaro byabereye mu Mudugudu wa Muyange, Akagali ka Rwoga, Umurenge wa Ruhango. 

Ni igikorwa kitabiriwe na: Umunyamabanga Nshingwabikorwa w’Umurenge wa Ruhango, Kayitare Wellars, wari uhagarariye Ubuyobozi bw’Akarere; Umuyobozi Mukuru w’Ibitaro by’Intara bya Ruhango, Dr Tuyishime Emile; Intumwa y’Ikigo cy’Igihugu Gishinzwe ubuzima (RBC), Dr Karamage Eliphaz, Umuyobozi w’Ikigo Nderabuzima cya Kigoma, abakozi batandukanye bo ku rwego rw’Umurenge wa Ruhango n’Ibitaro by’Intara bya Ruhango, abajyanama b’ubuzima ndetse n’abayeyi bo mu Midugudu y’Akagali ka Rwoga yegereye ahabereye iki gikorwa. 

Ubutumwa bwatanzwe bwibanze ku gukangurira abantu bose kuzitabira ibikorwa biteganyijwe harimo: gukingira abana bose bacikanwe n’inkingo, gutanga ikinini cya Vitamini A ku bana bafite amezi 6 kugeza kuri 59, gutanga ifu ya Ongera intungamubiri ku bana bafite amezi 6 kugeza kuri 23, gutanga ikinini cy’inzoka ku bana bafite umwaka kugeza ku mezi 59 no ku bantu bose bafite imyaka itanu no hejuru yayo; gupima imikurire abana bari munsi y’imyaka itanu, inyigisho n’ubujyanama ku bikorwa by’isuku n’isukura, inyigisho no gutanga serivise zo kuboneza urubyaro. 

Hasobanuwe kandi ko igihugu cyiza cy’ejo hazaza gishingiye ku buzima bwiza bw’abagituye, bityo bukaba bugomba kwitabwaho mu buryo bukwiriye kandi buhagije kuva umwana agisamwa no mu mikurire ye kugeza ageze igihe cyo gutanga ubuzima. 

Mu byo kwitaho harimo imirire iboneye kuri buri wese, by’umwihariko ku babyeyi batwite kuva bagisama, abana, n’abangavu; kwita ku isuku, gukingira abana bose bagahabwa inkingo zateganyijwe, no gushyira abana mu mashuri kandi bakiga neza. 

Icyumweru cy’ubuzima bw’umubyeyi n’umwana kiba kabiri mu mwaka. Icyumweru cyatangijwe uyu munsi kizasoza ku wa gatanu tariki 17 Mutarama 2025. Kugitangiza byaranzwe n’ibikorwa birimo: guha abana ikinini cya Vitamini A; gupima abana imikurire; gutanga ibinini by’inzoka ku bana n’abantu bakuru; guha abana indyo yuzuye, n’ubutumwa bw’abayobozi batandukanye.