Mu gihe mu Rwanda turi mu minsi 100 yo kwibuka ku nshuro ya 31 Jenoside yakorewe Abatutsi mu 1994, tariki ya 29 Gicurasi 2025  mu bitaro by’Intara bya Ruhango habaye igikorwa cyo kwibuka abari abakozi b'Ibigo Nderabuzima bya Kinazi na Mukoma, abarwayi n'abarwaza bazize Jenoside yakorewe Abatutsi mu 1994 .   

Iki gikorwa cyakozwe ku bufatanye bw’Ibitaro by’Intara bya Ruhango n’Ibigo Nderabuzima bya Kinazi na Mukoma, cyitabirwa na: Ubuyobozi n'abakozi b'Ibitaro bya Ruhango n'Ibigo Nderabuzima bya Kinazi na Mukoma, abahagarariye inzego z'ibanze n'iz'umutekano, Umuyobozi w’Umuryango IBUKA mu Karere ka Ruhango, Me Nyandwi Bernard, imiryango y'abayobozi n'abakozi b'Ibigo Nderabuzima bazize Jenoside yakorewe Abatutsi, bamwe mu bayobozi b’amadini n'amatorero mu Murenge wa Kinazi, n'abajyanama b'ubuzima. 

Mu ijambo ry'ikaze, Umuyobozi Mukuru w'ibitaro bya Ruhango, Dr Tuyishime Emile, yateruye yihanganisha kandi akomeza abarokotse Jenoside yakorewe Abatutsi, by'umwihariko imiryango y'abayobozi n’abakozi b'Ibigo Nderabuzima bya Kinazi na Mukoma bazize Jenoside yakorewe Abatutsi mu 1994. 

Yibukije ko kwibuka abazize Jenoside yakorewe Abatutsi ari umwanya wo kuzirikana ububi bwa Jenoside, ubugome n'ubukana Jenoside yakorewe Abatutsi mu Rwanda yakoranywe, kuzirikana no gushimira ingabo zayihagaritse no kongera kwiyemeza guharanira ko Jenoside itazongera kuba ahandi aho ariho hose ku isi. 

Yashimye ingabo za FPR Inkotanyi zahagaritse Jenoside zikarokora abahigwaga bari bataricwa, agaragaza ko ari abo gushimirwa igihe cyose.  Ati "Nkotanyi, muzahore mushimirwa igihe cyose, mwarakoze. Mwarakoze kubera aho mwakuye u Rwanda, mwarakoze kubera aho murugejeje, mwarakoze ku cyerekezo cyiza muruganishamo". 

Dr Tuyishime Emile yanagarutse ku ndangagaciro zaranze abayobozi n'abakozi b'Ibigo Nderabuzima bya Kinazi na Mukoma bazize Jenoside yakorewe Abatutsi, maze asaba abakora mu rwego rw'ubuzima muri iki gihe gutera ikirenge mu cyabo, no guharanira gusohoza ikivi batabashije kusa. Muri izo ndangagaciro harimo: gukunda Igihugu, ubutwari, gukunda umurimo no kuwunoza, ubumenyi n'ubuhanga, kwanga umugayo,...

Umuyobozi Mukuru w’Ibitaro bya Ruhango kandi yagaye cyane abari bashinzwe kwita ku buzima nyamara aho kuburengera bakica bagamije kurimbura Abatutsi. Ati "Batatiye igihango; aho bari bigaye; abakiriho basabe imbabazi babivanye ku mutima kuko abarokotse Jenoside bahora biteguye kuzitanga ku muntu wese uzisabanye umutima wicuza".

Yasabye kandi abazi amakuru y'ahari imibiri itarashyingurwa y'abazize Jenoside yakorewe Abatutsi mu 1994 kuyatanga kugira ngo izashyingurwe mu cyubahiro. 

Mu gusoza, yasabye abakora mu rwego rw'ubuzima nuri iki gihe kugendera kure no kurwanya ingengabitekerezo y'urwango no guharanira ko Jenoside itazongera ukundi aho ariho hose ku isi.

Mu butumwa bwe, Umunyamabanga Nshingwabikorwa w’Umurenge wa Kinazi, Bwana Gasasira François Régis, wari Umushyitsi Mukuru, na we yagaye abakoraga mu rwego rw’ubuzima bijanditse muri Jenoside yakorewe Abatutsi, ku isonga hakaba hari Kagabo Charles wari Burugumesitiri wa Komini Ntongwe. Yasabye abakora mu rwego rw’ubuzima muri iki gihe guhora bazirikana ko umuhamagaro wabo ari ukwita ku buzima no kuburengera, no kwita uko bikwiriye kuri buri wese ubagana, nta kimenyane, cyangwa amarangamutima ashingiye ku kindi icyo ari cyo cyose. 

Yanenze abagoreka amateka ya Jenoside yakorewe Abatutsi mu Rwanda n’abayavuga uko atari, asaba buri wese kumenya no kuvuga amateka nyakuri ya Jenoside yakorewe Abatutsi, no kwirinda kugwa mu mutego w’abagamije guhakana no gupfobya Jenoside yakorewe Abatutsi mu Rwanda mu 1994.   

Bwana Gasasira François Régis yasabye Urubyiruko kurwanya abahakana n’abapfobya Jenoside bakoresheje imbuga nkoranyambaga, arusaba gukoresha izo mbuga mu guhangana na bo by’umwihariko bagaragaza amateka nyakuri y’icurwa n’ishyirwa mu bikorwa ry’umugambi mubisha wo kurimbura Abatutsi. 

Yasabye kandi urubyiruko gukoresha neza amahirwe bafite yo kugira Igihugu kitavangura, aho buri wese anganya amahirwe n’undi wese, bagaharanira kwiga ndetse no gukora cyane bagamije gutera imbere no kugera kure heza hashoboka. 

Perezida wa IBUKA mu Karere ka Ruhango, Me Nyandwi Bernard na we yamaganye cyane abagifite ingengabitekerezo y'urwango na jenoside, abasaba kureka koreka urubyiruko rw'iki gihe n'ejo hazaza. Yasabye kandi urubyiruko kwirinda no kurwanya bene abo bantu, ndetse no guharanira ko iyo ngengabitekerezo iranduranwa n’imizi yayo, igacika burundu. 

Madamu Muhoracyeye Eugénie, mu buhamya yatanze, yavuze kuri bimwe mu byaranze abayobozi n'abakozi b'Ibigo Nderabuzima bya Mukoma na Kinazi bazize Jenoside (abantu azi neza kuko yakoranye na bo aho yavuraga i Mukoma), by'umwihariko agaruka ku: ubutwari, umurava, gukunda igihugu no kwihangana. 

Yagaragaje kandi inzira y'umusaraba Abatutsi banyuzemo mbere no mu gihe Jenoside yakorwaga, ashimira Inkotanyi zayihagaritse zikarokora abari bataricwa. 

Yasabye urubyiruko gusoma amateka nyakuri ya Jenoside yakorewe Abatutsi n'imvano y'ingengabitekerezo y'urwango yagejeje u Rwanda kuri Jenoside yakorewe Abatutsi mu 1994, no guharanira ko Jenoside itazongera kubaho ukundi aho ariho hose ku Isi. 

Madamu Muhoracyeye kandi yasabye abazi ahari imibiri y'Abatutsi bishwe muri Jenoside itarashyingurwa kureka kwinangira bagatanga amakuru kugira ngo iyo mibiri na yo izashyingurwe mu cyubahiro.

Igikorwa cyo kwibuka abari abakozi b'Ibigo Nderabuzima bya Kinazi na Mukoma, abarwayi n'abarwaza bazize Jenoside yakorewe Abatutsi mu 1994 cyaranzwe na: Gushyira indabo ku bimenyetso by'amateka ya Jenoside yakorewe Abatutsi mu 1994 byanditseho amazina y'abamaze kumenyekana bazize Jenoside yakorewe Abatutsi mu 1994 barimo abari abayobozi n'abakozi mu bigo nderabuzima bya Kinazi na Mukoma; urugendo rwo kwibuka; gushyira indabo ku Rwibutso rwa Jenoside yakorewe Abatutsi mu 1994 rwa Kinazi no kunamira imibiri isaga ibihumbi 63 y'abazize Jenoside yakorewe Abatutsi mu 1994 iharuhukiye; Ikiganiro ku mateka ya Jenoside yakorewe Abatutsi mu Rwanda;  indirimbo zo kwibuka; ubuhamya;  ubutumwa bw'abayobozi no kuremera uwacitse ku icumu rya Jenoside yakorewe Abatutsi utishoboye.