Barasabwa guhoza ijisho ku bipimo by’ubuzima

Ubuyobozi bw’Ibitaro bya Ruhango burakangurira abakozi guhoza ijisho ku bipimo by’ubuzima mu rwego rwo gusigasira ubuzima bw’abaturage.   

Ubu ubutumwa bwagarutsweho mu nama ngarukakwezi yo guhuza ibikorwa (Coordination Meeting) yabaye kuri uyu wa gatatu tariki ya 30 Nzeri 2026. 

Umuyobozi w’Ishami rishinzwe ubushakashatsi mu bitaro bya Ruhango, Mugenzi Serugendo Fabien, yasabye abayitabiriye kwitwararika gushyira mu bikorwa ingamba zose Igihugu cyashyizeho mu rwego rwo kubungabunga no guteza imbere ubuzima. 

Yagize ati “Ubuyobozi bw’Ibitaro buratwibutsa ko Igihugu gishyize imbere ubuzima bwiza bw’umuturage, bukaba budubasaba gushyira mu bikorwa mu buryo bukwiye ingamba zose zashyizweho mu kurengera no gusigasira ubuzima bwa buri munyarwanda aho dukorera”. 

Ati “Ni yo mpamvu Ubuyobozi bw’ibitaro bubashishikariza kudahuga mu kugenzura no gutahura hakiri kare ibishobora kubangamira ubuzima bw’abaturage, bukanabasaba gushyira mu bikorwa imyanzuro y’iyi nama n’indi yose ifatwa mu rwego rwo gukemura ibibangamiye ubuzima bw’umuturage”.   

Inama yo guhuza ibikorwa (Coordination Meeting) iba buri kwezi, by’umwihariko ikaba igamije gusuzuma no guhuza ibikorwa by’ibitaro n’ibigo nderabuzima no gufata ingamba zihamye zo kuzamura ibipimo by’ubuzima bikiri hasi, ndetse no gukumira ko ibyageweho byasubira inyuma.